Aintzane Usandizaga Lopez, Asier Iturralde "Gaston". Pamiela, 2019. (Euskaraz)

Euskal haur literaturaren altxorretarik dugu album bikain hori, haurrei zuzendua izanik ere, jende helduei ere gustatuko baitzaie. Irakurleari rol aktiboa ematen dio, testuak eta irudiek elkar osatzen dute eta abilki ekarriak dira, eta gainera umorez beteriko obra dugu!

Albumaren protagonistak, adineko gizon bat eta haren biloba dira. Nortasun arras desberdinak dituzte. Aitatxi apur bat “psikogogorra” da, printzipioak baditu eta araberako arauei jarraikiz bizi da. Neskatoa, aldiz, bizi-bizia da eta haurrek komunzki egiten duten bezala, bazterrak nahasten ditu. Biziki maite dute elkar eta neskatoa badoa aitatxiren etxera asteburua han pasatzera.

Istorioa bi ildo narratiboren bidez segitzen dugu. Narratzailea neskatoa da. Testu gutiz, bere haur ikuspuntutik azaltzen du asteburua nola iragan duen. Parean, irudiek errealitate desberdina erakusten dute eta bien arteko kontrastea zinez irrigarria da.

Estetikaren ikuspegitik ongi kausitua da albuma. Irudi biziak dira, bortitzak izan gabe, bai koloreen aldetik, bai marrazteko estiloaren aldetik, eta biziki adierazgarriak dira. Marrazkilariak gorputzaren hizkuntza ongi menderatzen du eta horrek anitz ekartzen dio narrazioari.
Irakurle gazteei liburua gustatuko zaie, baina osoki gozatzeko, inplizituaren ulertzeko gai izanez geroz. Helduek, aldiz, erreferentziak preziatuko dituzte (bereziki 1980 hamarkadako musika maite dutenenek, Pink Floyd, Itoiz eta abar...).

Ikusiz zer heinetaraino ongi elkar osatzen duten testuak eta marrazkiek, pentsa daiteke idazleak eta irudigileak aspalditik elkar ezagutzen dutela eta epe luzeko proiektu baten emaitza dela albuma. Baina ez da horrela; Aintzane Usandizaga Lopezek eta Asier Iturraldek albumak sortzeko tailer batean parte hartzeko izena eman zuten, han elkar ezagutu eta bost egunen buruan, albuma sortu! Kausitze aipagarria!

Elise Dilet - IKAS

Non aurkitu obra hau?

Bilaketa

Dokumentu bat bilatu

Artikulu bat bilatu