Azken berriak

2019ko Durangoko azokaren berrikuntzak

Liburu eta diskoaren 54. azoka iraganen da Durangon abenduaren 5tik 8ra. Bi berrikuntza nagusi azpimarratzekoak dira aurten: erakusmehaien antolaketa moldatua izanen izanen da; kolore eta ikur batzuei esker bisitariek erakusleengana hurbiltzeko norabidea errazkiago segitzen ahalko dute. Aurten lehen aldikotz, musika programatzaile, sortzaile eta profesionalei zuzendutako topaketa antolatua izanen da ostegun goizarekin.

Azkenik, azokak hedatzen segitzen du eta hemendik aitzina Durangoko eskola musikan ere kokatuko da. Eremu berri horrek Gogoetaren plaza – informazioa, komunikazioa eta hedabideen gunea – eta Kabi – kultur digitalen gunea – aterbetuko ditu.

Durango 2019 zenbait zenbakitan:

264 erakusmahai;

405 berritasun: 273 liburu, 91 disko, 16 aldizkari eta 5 film;

200 kultur ekitaldi;

111 topaketa idazleekin, sortzaileekin eta musikalariekin.

 

Ikus egitarau osoa

WikiLovesMonuments argazki lehiaketako irabazleak

Irailean WikiLovesMonuments lehiaketa iragan da Euskal Herrian. EWKE-k edo Euskal Wikilarien Kultura Elkarteak antolaturik, aurtengo argazki lehiaketak arrakasta handia ukan du, orotara 1370 argazki bildu baititu. Oroitaraz dezagun lehiaketa horren helburua Euskal Herriko ondare eraikiaren zerrendatze zehatza egitea dela eta parada baliatuz, Wikipedia entziklopedia askea irudiz elikatzea.

 

Horra lehen 3 irabazleak:

1. Mollarri gauez, izarren mugimendua atzean, Theklan

2. Nafarroa – Ibañeta, Igerrak

3. Bizkaia zubia – Puente_Bizkaia, Ebaki

 

Ikus artikulua EWKE-ren gunean

Le Chipiron Lecteur haur literatur festibala

Le Chipiron Lecteur 0-16 urte arteko haur literatur festibala Hendaiako Mendi-Zolan kultur zentroan iraganen da azaroaren 15tik 17ra, Txikiekin elkarteak antolaturik. Festibalaren xedea tokiko eleaniztasuna islatzea denez, bertara gomitatuak diren idazle eta argitaletxeak euskaldunak, frantsesak edo espainolak dira. 

 

Ikus gunea

Bernardo Atxaga Espainiako Letren Sari Nazionalaren irabazle

Espainiako Kultur Ministerioak 1984az geroztik urtero banatzen duen sariak egile baten obra osoa ohoratzen du. Cervantes sari ospetsua gaztelerazko idazleei banatua baldin bada, Espainiako Letren Sari Nazionala haatik iberiar lurraldeko hizkuntza batetan idazten duen sortzaile orori zuzendua da. Aurten lehen aldikotz, euskal idazle batek lortu du. Aitortza ofizialarekin batera Bernardo Atxagak 40 000 €ko beka jasoko du.

 

Ikus Berrian

Bilaketa

Dokumentu bat bilatu

Artikulu bat bilatu

Azken berriak