Azken berriak

"Goresmenak Xalbadorri" erakusketa Zarautzeko argazki museoan

Goresmenak Xalbadorri argazki erakusketa irailaren 3n hasi da Zarautzeko Photomuseum argazki eta zinema museoan. Erakusketa berri horrek Fernando Aire Etxart (1920-1976) bertsolari ospetsua zenaren bizia kontatzen du hainbat argazki eta garaiko dokumentuen bidez. Lehen atalean, erakusketak olerkariaren familia, adiskideak eta Urepele bere sorterria aipatzen ditu. Bigarren atala bertsolaritzaren munduari lotzen da, plazako saioei eta txapelketei. Bururatzeko, 1976ko azaroaren 7n Urepelen Xalbadorren ehorzketen kari egin zitzaion omenaldia agertzen da. Erakusketa urriaren 13a arte ikus daiteke.

Ikus Photomuseum.name gunean

Euskal ondarearen erradiografia parte hartzailea Wikipedian

Aurten ere irailean, Wikipedia entziklopedia libre eta parte hartzaileak WikiLovesMonuments argazkilaritza lehiaketa antolatzen du. Herrialde ezberdinetako parte hartzaileek bereaien eskualdeko ondare eraikia argazkitan hartzea da helburua, inbentario ahal bezain osoa egiteko xedearekin. Egitasmoa 2010n abiatu zen Herbereetan, geroztik mundu guzira hedatu da laster eta gaur egun kasik  200 000 argazki biltzen ditu urtero.

Euskal Wikilarien Kultura Elkartea (EWKE) 2017n lehiaketari lotu zen lehen aldiz baina laster ohartu zen Euskal Herrian kokatu monumentu ohargarri arras guti agertzen zirela Wikipedian : 217 Ipar Euskal Herrian eta 433 Hego Euskal Herrian, hots soilik 650 lurralde osoan. Hutsune horren betetzeko, monumentuak zerrandatzen dituzten datu-base ezberdinak berreskuratzeko urratsak egin dituzte euskal Wikilariek. Iparraldeari begira, nahiko erraza izan da, Mérimée (Monumentu historikoak) et Palissy (Ondare higigarria) datu-base eguneratuen argibideak jaso baitituzte. Hegoaldeari begira, zerrendatzea zailagoa izan da Espainiako Kultura Ministerioak ematen duen Bien de Interés Cultural (BIC) bermea azkenekoz 1985an egin inbentarioan gelditzen baita. Argibide gehigarriak iturri ezberdinetatik hartu behar izan ditu beraz EWKE-k: Eusko Jaurlaritza, Nafarroako Udalak, Hilarriak taldea (Nafarroako Monumentu Megalitikoak). Halaber, UNESCO erakundeak Donejakue Bidean kokatu eraikin azpimarragarrien zerrenda ere berreskuratu du.

Ondorioz 10 000 gune ohargarri txertatu dituzte Euskal Herriko mapari. Gune gehienentzat momentuko oinarrizko argibideak baizik ez dira zehaztuak, hots izenak eta koordenatu geografikoak. Fitxa horien osatzeko, WikiLovesMonuments lehiaketaren haritik, edonork parte har dezake identifikatutako guneak argazkitan hartuz eta Wikimedia Commons (ikus-entzunezko liburutegi numeriko  librea) gunera igoz. Euskal Herriko monumentuen argazki bilduma osoa eta librea elikatzen laguntzen ahal duzu zuk ere, hemengo ondarearen begiratzeko eta jendarteratzeko. Xehetasun gehiagoren ukaiteko Wikiproiektu:Ondarea orria bisita dezakezu. Argazki lehiaketan parte hartzeko iraila bukaera da azken epea.

 

Ikus Wikimedia.eus gunean

Oskar Alegriaren film berria Veneziako Mostran

Veneziako Mostra nazioarteko zine festibalaren 76. edizioa agorrilaren 29tik irailaren 8ra iraganen da. Oskar Alegria film egile irundarraren Zumiriki lan berria hautatua izan da festibaleko Orizzonti sailean parte hartzeko. Sail horrek mundu guziko zinema adierazpen-korronte eta jario estetiko berriak argitara ematen ditu; jaialdiko bigarren sail nagusia da, hautespen ofizialaren ondotik. Nahiz eta Emak bakia Baita bere lehen dokumentalarentzat Alegria hamabost aldiz sariztatua izan zen, euskal film zuzendariarentzat gomita hori ustekabe pozgarria da, Veneziako Mostra hedadura handiko gertakaria baita.

Zumiriki hitzak «ibai uharte» erran nahi du. Alegriak haurtzaroan ezagutu zuen gune baten aipamena da, kuttuna zitzaiona eta eraikuntza egitasmo batengatik urperatua izan zena. Haurtzaroari, bizitza salbaiari eta izadiari berriz lotzeko nahian, film egileak baso erdiko etxola batetan lau hilabeteko egonaldi bakartiarra bizi izan eta filmatu du. «Fikziozko istorio definiezin bat» dela dio egileak, ezin sailkatua, barne aztertze poetiko bat.

Ikus artikulua Etxepare.eus gunean

Dantza filma Iparraldeko zine-geletan

Dantza, Telmo Esnalen film berria ipar Euskal Herriko zine geletan azkenean ikusgai izanen da irailaren 4tik goiti, Gabarra films egiturak banaturik. Estrenaldi gaualdi bat antolatuko da Baionako Atalante zine aretoan agorrilaren 20n, asteartean 21:00tan urririk. Biarritzeko Maitaldia dantza festibalaren kari ere emana izanen da Le Royal zine gelan agorrilaren 30n 20:00tan. Gaualdi hauetan, Esnal zuzendariarekin, Gari Otamendi dantzariarekin eta Juan Antonio Urbeltz koreografoarekin trukatzeko aukera izanen da. 

Ikus eke.eus gunean

Bilaketa

Dokumentu bat bilatu

Artikulu bat bilatu

Azken berriak